Елен Скок – легендата зад мистичниот мост во околината на Могорче

Елен Скок (Еленски Скок или Елен Мост) e камен мост во околината на с. Могорче преку Мала Река во Реканскиот регион на западна Македонија. Изграден e кон средината на XVIII век од делкан камен со само еден лак според плановите и од страна на Мимар Хајрудин — архитект на Стариот мост на Неретва во Мостар и ученик на прочуениот архитект Мимар Синан.

Постојат повеќе легенди за ова мистично и прекрасно место.

most-elen-skok-nacionalni-park-mavrovo-400x600

Според првата легенда, мостот е изграден во знак на сеќавање на момчето кое, за да ја одбрани честа на својата девојка, убил еден турски бег. По настанот, Турците пратиле силен аскер за да го фатат. Гонет од аскерот момчето бегало и стасало до надојдената Мала Река. Во тој момент на очај и безизлез за момчето, од шумата се појавиле самовили и го претвориле во прекрасен елен, кој без проблем ја прескокнал реката. Подоцна, во знак на сеќавање на настанот, но и како благодарност до самовилите, селаните го изградиле мостот.

Втората легенда раскажува за бегот кој со својата војска се обидувал да улови еден елен којшто постојано им бегал и никако не допуштал да му се приближат. Иако бил ранет, еленот не им се предавал ни во оној момент кога бегството речиси било невозможно. Кога се нашол на брегот на Мала Река, не двоумејќи се, скокнал на другиот крај на реката и таму починал. Восхитен од неговата храброст и упорност да достои до крај, не предавајќи му се на непријателот, бегот наредил во негова чест да се изгради мост, што ќе го симболизира тој судбоносен скок на еленот.

deer-forest-life-desktop-background

Третата легенда вели: На планината Стогово, во непосредна близина на селото Могорче, ловџија од селото, одејќи на лов пресретнал елен. Ја подигнал пушката за да пука. Но, кога еленот го погледал, сфатил дека еленот со топлиот поглед и ставот како да го моли да не пука, да не го убива. Ловџијата бил маѓепсан, ја спуштил пушката, се доближил до еленот и почнал да го гали, а тој со главата го гушкал и го изразил своето пријателство. Така ловџијата и еленот се спријателиле и секој ден се дружеле. Lовџијата им раскажа на селаните за неговите средби со еленот. Тие едно утро се упатиле да го бараат. Го сретнале и се обиделе да го фатат, но еленот почнал да бега за да не стане плен и се обидел да ја прескокне реката. Но, не успеал. Скокот бил за неколку педи пократок, поради што ги скршил предните нозе. Во спомен на храброста и убавината на еленот, селаните на Могорче, кои биле прочуени мајстори, го соѕидале овој мост со невообичаена градба и архитектура.

Категории
Текнувало

ПОВРЗАНО